राज्यात मान्सूनने पुन्हा जोर धरला असून विदर्भातील अनेक जिल्ह्यांमध्ये पुढील दोन दिवस मुसळधार पावसाची शक्यता वर्तविण्यात आली आहे. भारतीय हवामान विभागाने नागपूरसह विदर्भातील अनेक भागांसाठी ऑरेंज अलर्ट जारी केला असून, वादळी वारे, विजांचा कडकडाट आणि जोरदार पावसाचा इशारा दिला आहे.
या पार्श्वभूमीवर नागपूर जिल्हा प्रशासनाने विद्यार्थ्यांच्या सुरक्षिततेला प्राधान्य देत शाळा, महाविद्यालये तसेच कोचिंग संस्थांना सुट्टी जाहीर केली आहे. हवामानाचा अंदाज लक्षात घेऊन आवश्यक ती सर्व खबरदारी घेण्याच्या सूचना प्रशासनाने संबंधित यंत्रणांना दिल्या आहेत.
सखल भागांमध्ये पाणी साचणे, काही ठिकाणी पूरसदृश परिस्थिती निर्माण होणे तसेच नदी-नाल्यांच्या पाणीपातळीत वाढ होण्याची शक्यता लक्षात घेऊन नागरिकांनी अनावश्यक प्रवास टाळावा, असे आवाहन करण्यात आले आहे. अत्यावश्यक कामाशिवाय घराबाहेर पडू नये तसेच हवामान विभाग आणि स्थानिक प्रशासनाच्या सूचनांचे पालन करावे, असेही प्रशासनाने स्पष्ट केले आहे.
आपत्ती व्यवस्थापन, महसूल, पोलीस, अग्निशमन दल आणि स्थानिक स्वराज्य संस्थांना सतर्क राहण्याचे निर्देश देण्यात आले असून, कोणतीही आपत्कालीन परिस्थिती उद्भवल्यास तातडीने मदत पोहोचविण्यासाठी यंत्रणा सज्ज ठेवण्यात आली आहे.
हवामान विभागाच्या माहितीनुसार, विदर्भातील अनेक भागांमध्ये पुढील २४ ते ४८ तासांत मुसळधार ते अतिमुसळधार पावसाची शक्यता आहे. त्यामुळे नागरिकांनी अफवांवर विश्वास न ठेवता केवळ अधिकृत हवामान आणि प्रशासनाच्या सूचनांवरच विश्वास ठेवावा, असे आवाहन करण्यात आले आहे.
