बोंडअळी आणि इतर कीड-रोगांच्या प्रादुर्भावामुळे सुमारे २५ वर्षांपूर्वी फलटण तालुक्यातून जवळपास नामशेष झालेले ‘पांढरे सोने’ अर्थात कापूस पीक पुन्हा उभारी घेत आहे. गेल्या सात-आठ वर्षांपासून तालुक्यात कापूस लागवडीचे क्षेत्र सातत्याने वाढत असून, यंदाच्या हंगामात तब्बल ८७८ हेक्टर क्षेत्रावर लागवड झाली आहे.
पूर्वी बोंडअळी आणि अन्य कीड-रोगांमुळे कापूस शेतीचे मोठे नुकसान झाले होते. त्यामुळे फलटण तालुक्यात या पिकाखालील क्षेत्र जवळपास संपुष्टात आले. मात्र, गेल्या काही वर्षांत शेतकरी पुन्हा कापूस लागवडीकडे वळले असून क्षेत्रात सातत्याने वाढ होत आहे.
यंदा ८७८ हेक्टरवर कापूस लागवड झाली आहे. हमीभावापेक्षा अधिक दर मिळत असल्याने कापूस उत्पादक शेतकऱ्यांना दिलासा मिळाला आहे. त्यामुळे फलटण तालुक्यात कापूस शेतीला पुन्हा चालना मिळण्याची चिन्हे आहेत.
