बारामतीमध्ये गुरुवारी अजित दादांच्या स्मृतींना अभिवादन करण्यात आले. २८ मे रोजी त्यांना जाऊन चार महिने पूर्ण झाल्यानंतर जय पवार यांनी स्मृतिस्थळी जाऊन श्रद्धांजली अर्पण केली. यावेळी कार्यकर्ते, पदाधिकारी आणि स्थानिक नागरिक उपस्थित होते.
बारामतीच्या विकासात अजित दादांनी दिलेले योगदान, जनतेशी ठेवलेला सातत्यपूर्ण संपर्क आणि स्थानिक प्रश्नांवर काम करण्याची त्यांची शैली आजही अनेकांसाठी प्रेरणादायी मानली जाते. त्यामुळे त्यांच्या स्मृतींना अभिवादन करताना विकासकामांचा वारसा आणि जनसंपर्काची परंपरा कायम ठेवण्यावर भर दिला जात असल्याचे चित्र पाहायला मिळाले.
स्मृतिस्थळी अभिवादनानंतर कसबा परिसरातील राष्ट्रवादी कार्यालयात नियमित जनता दरबार पार पडला. दर गुरुवारी आयोजित करण्यात येणाऱ्या या जनता दरबारात शहर आणि ग्रामीण भागातील नागरिकांनी विविध समस्या मांडल्या. पाणीपुरवठा, रस्ते, शेती, वीज, शासकीय कामकाज आणि स्थानिक विकासाशी संबंधित प्रश्नांवर चर्चा करण्यात आली.
जय पवार यांनी नागरिकांच्या अडचणी समजून घेत संबंधित विभागांशी समन्वय साधण्यावर भर दिला. गेल्या काही महिन्यांत बारामतीतील विविध भागांमध्ये भेटी, स्थानिक प्रश्नांवर चर्चा आणि जनसंपर्क वाढवण्यावर त्यांचे विशेष लक्ष असल्याचे दिसून येत आहे.
बारामतीमध्ये जनतेशी थेट संवाद साधण्याची परंपरा कायम ठेवत स्थानिक प्रश्न सोडवण्याच्या प्रक्रियेला गती देण्याचा प्रयत्न सुरू असल्याची चर्चा राजकीय वर्तुळात होत आहे.
