देशभर सुरू असलेल्या १६ व्या डिजिटल जनगणना मोहिमेअंतर्गत राज्याच्या उपमुख्यमंत्री सुनेत्राताई पवार यांनी काटेवाडी येथील निवासस्थानी जनगणनेची माहिती नोंदवून घेतली. यावेळी प्रगणक वनिता जाधव यांनी टॅबच्या माध्यमातून कुटुंबाची माहिती संकलित केली.
सामान्यतः औपचारिक वाटणाऱ्या या प्रक्रियेदरम्यान मात्र एक भावनिक क्षण अनुभवायला मिळाला. घरातील सदस्यांची माहिती देताना सुनेत्राताई पवार यांनी कुटुंबातील व्यक्तींचा उल्लेख केला. याचवेळी "दादा" असा उल्लेख होताच त्या काही क्षण शांत झाल्या. त्यांच्या चेहऱ्यावर उमटलेले भाव आणि क्षणभर निर्माण झालेली शांतता उपस्थितांच्या मनाला स्पर्शून गेली.
मोठ्या सार्वजनिक जबाबदाऱ्या सांभाळणाऱ्या व्यक्तींच्याही मनात नात्यांविषयीची ओल आणि जिव्हाळा किती खोलवर रुजलेला असतो, याची जाणीव या प्रसंगातून झाली. उपस्थितांनीही हा क्षण अत्यंत भावूक वातावरणात अनुभवला.
प्रगणक वनिता जाधव यांनी सांगितले की, उपमुख्यमंत्री पदावरील व्यक्तीची माहिती घेण्याची जबाबदारी असल्यामुळे सुरुवातीला मनावर दडपण होते. मात्र प्रत्यक्ष भेटीनंतर सुनेत्राताई पवार यांच्या साधेपणाने आणि आपुलकीच्या स्वभावाने ते दडपण काही क्षणांत दूर झाले.
जनगणनेची माहिती देताना त्यांनी अत्यंत संयमाने सर्व प्रश्नांची उत्तरे दिली. तसेच, "तुम्ही चहा घेतला का?" अशी प्रेमळ विचारपूस करत त्यांनी प्रगणकांचीही आत्मीयतेने चौकशी केली. त्यांच्या या साध्या आणि माणुसकीपूर्ण वागणुकीमुळे जनगणनेच्या कामासाठी आलेल्या कर्मचाऱ्यांना घरच्यांसारखे वातावरण लाभल्याची भावना व्यक्त करण्यात आली.
सोळाव्या डिजिटल जनगणनेच्या पार्श्वभूमीवर झालेली ही भेट केवळ शासकीय प्रक्रिया न राहता माणुसकी, आपुलकी आणि भावनिक नात्यांचा अनुभव देणारी ठरली.
