जळगाव जिल्ह्यातील चाळीसगाव येथील छत्रपती शिवाजी महाराज चौकात शनिवारी पोलीस भरतीची तयारी करणाऱ्या तरुण मुला-मुलींसाठी भरतीपूर्व प्रशिक्षण शिबिराचे आयोजन करण्यात आले होते. जिल्हा पोलीस दलाच्या पुढाकाराने झालेल्या या उपक्रमाला चाळीसगाव शहरासह आसपासच्या ग्रामीण भागातील हजारो उमेदवारांनी हजेरी लावली. मैदानी चाचणी आणि लेखी परीक्षेची तयारी कशी करावी याबाबत मार्गदर्शन मिळवण्यासाठी युवकांनी या ठिकाणी मोठी गर्दी केली होती.
या विशेष सोहळ्याला स्थानिक आमदार मंगेश चव्हाण यांच्यासह नगराध्यक्षा प्रतिभा चव्हाण यांची खास उपस्थिती लाभली होती. शिबिरादरम्यान उपस्थित मार्गदर्शकांनी भरतीसाठी आवश्यक असणारी शारीरिक क्षमता, मैदानी तयारी तसेच लेखी परीक्षेचा अभ्यास कसा करावा यावर सविस्तर प्रकाश टाकला. याशिवाय अर्ज भरताना व निवडीच्या वेळी लागणाऱ्या महत्त्वाच्या कागदपत्रांची अचूक माहिती उमेदवारांना देण्यात आली.
कार्यक्रमाला पोलीस दलातील वरिष्ठ अधिकारी मोठ्या संख्येने उपस्थित होते. यामध्ये पोलीस अधीक्षक श्रीकांत धिवरे, अपर अधीक्षक संदीप गावित, अपर अधीक्षक अशोक नखाते आणि उपविभागीय अधिकारी विजय ठाकूरवाड यांचा समावेश होता. तसेच सह्याद्री बिले, पोलीस निरीक्षक अमित मनेळ, सहायक निरीक्षक भरत चौधरी, विजय माळी, श्री दाते व उपनिरीक्षक कुणाल चव्हाण यांच्यासह चाळीसगाव शहर, ग्रामीण व मेहुणबारे पोलीस ठाण्याचे कर्मचारी उपस्थित होते.
पोलीस दलात भरती होण्याचे स्वप्न पाहणाऱ्या ग्रामीण भागातील तरुणांना योग्य दिशा मिळावी या उद्देशाने या शिबिराचे नियोजन करण्यात आले होते. योग्य माहिती आणि मार्गदर्शनामुळे उमेदवारांचा आत्मविश्वास वाढण्यास मदत होणार आहे. या शिबिरामुळे आगामी भरती प्रक्रियेत तालुक्यातील जास्तीत जास्त तरुण यश मिळवतील असा विश्वास आयोजकांनी व्यक्त केला आहे.
