Strait of Hormuz ही जगातील अत्यंत महत्त्वाची तेलवाहतूक मार्गिका दीर्घकाळ बंद राहिल्यास जागतिक अर्थव्यवस्थेला मोठा धक्का बसू शकतो, असा इशारा आंतरराष्ट्रीय ऊर्जा संशोधन संस्था Wood Mackenzie च्या अहवालातून देण्यात आला आहे.
या अहवालानुसार, होर्मुझ सामुद्रधुनीतील वाहतूक अडथळा दीर्घकाळ कायम राहिल्यास कच्च्या तेलाच्या किमती प्रति बॅरल तब्बल 200 डॉलरपर्यंत वाढू शकतात. यामुळे जगभरात इंधन महागाईचा मोठा फटका बसण्याची शक्यता आहे.
होर्मुझ मार्ग हा जागतिक तेल व्यापारासाठी अत्यंत महत्त्वाचा मानला जातो. जगातील मोठ्या प्रमाणात कच्च्या तेलाची वाहतूक या मार्गातून होते. त्यामुळे या मार्गात अडथळा निर्माण झाल्यास पुरवठा साखळी विस्कळीत होऊन ऊर्जा संकट निर्माण होऊ शकते.
अहवालात पुढे नमूद करण्यात आले आहे की, अशा परिस्थितीत जागतिक मंदीचे संकट अधिक गडद होऊ शकते. विशेषतः भारतासारख्या मोठ्या तेल आयातदार देशांवर याचा थेट परिणाम होण्याची शक्यता आहे.
इंधन दरवाढ, महागाई वाढ आणि आर्थिक अस्थिरता यामुळे अनेक देशांच्या विकासदरावर परिणाम होऊ शकतो, असा इशाराही तज्ज्ञांनी दिला आहे. त्यामुळे आंतरराष्ट्रीय पातळीवर या परिस्थितीवर बारकाईने लक्ष ठेवले जात आहे.
