बॉलिवूडचा प्रसिद्ध अभिनेता सलमान खान पुन्हा एकदा मोठ्या पडद्यावर जबरदस्त शैलीत प्रेक्षकांच्या भेटीला येणार आहे. त्याच्या आगामी मातृभूमी मे वॉर रेस्ट इन पीस या सिनेमाचा बहुप्रतीक्षित ट्रेलर समोर आला आहे. भारत आणि चीनदरम्यान 2020 मध्ये गलवान खोऱ्यात झालेल्या संघर्षाच्या पार्श्वभूमीवर हा सिनेमा तयार करण्यात आला आहे. ट्रेलरमध्ये देशभक्ती, सैनिकांचे शौर्य आणि युद्धाचा कुटुंबांवर होणारा परिणाम दाखवण्यात आला आहे.
ट्रेलरची सुरुवात पूर्व लडाखमधील बर्फाच्छादित भागातून होते आणि सलमान खान सैन्याच्या १६ बिहार रेजिमेंटमधील अधिकारी म्हणून दिसतो. सुरुवातीला चर्चेने वाद मिटवण्याचा प्रयत्न होतो, पण चिनी सैनिकांच्या मागणीमुळे परिस्थिती बिघडते. त्यानंतर दोन्ही बाजूंच्या सैनिकांमध्ये तीव्र हाणामारी पाहायला मिळते. सिनेमात केवळ लढाई नाही, तर युद्ध टाळण्याच्या प्रयत्नांना आणि सैनिकांच्या धैर्याला मोठे स्थान दिले गेले आहे.
या सिनेमात अभिनेत्री चित्रांगदा सिंह सलमानच्या पत्नीची भूमिका साकारत आहे. सीमेवर जाण्यापूर्वीचे भावनिक क्षण आणि कुटुंबासोबतचे प्रसंग ट्रेलरमध्ये भावूक करणारे आहेत. युद्धाचा परिणाम केवळ सीमेवर लढणाऱ्यांवर नाही, तर त्यांच्या घरी असणाऱ्या कुटुंबीयांवरही होतो, हे या दृश्यांतून उत्तम प्रकारे मांडले आहे.
अपूर्व लाखिया यांनी या सिनेमाचे दिग्दर्शन केले असून सलमान खान फिल्म्सच्या बॅनरखाली निर्मिती झाली आहे. हा सिनेमा कोणत्याही एका व्यक्तीची यशोगाथा नसून दोन्ही देशांतील सैनिक आणि त्यांच्या कुटुंबांची कथा असल्याचे स्पष्ट केले गेले आहे. येत्या काळात हा सिनेमा प्रेक्षकांचे मोठे मनोरंजन करणार यात शंका नाही.
