भारत निवडणूक आयोगाने महाराष्ट्रातील राज्यसभा रिक्त जागेसाठी पोटनिवडणुकीची घोषणा केली आहे. राज्यसभा सदस्य सुनेत्रा पवार यांनी 6 मे 2026 रोजी दिलेल्या राजीनाम्यानंतर ही जागा रिक्त झाली होती. या जागेचा कार्यकाळ 4 जुलै 2028 पर्यंत असल्याने उर्वरित कालावधीसाठी आता पोटनिवडणूक घेण्यात येणार आहे.
निवडणूक आयोगाने जाहीर केलेल्या अधिकृत वेळापत्रकानुसार, 1 जून 2026 रोजी निवडणुकीची अधिसूचना जारी केली जाईल. त्यानंतर उमेदवारांना 8 जूनपर्यंत उमेदवारी अर्ज दाखल करता येणार आहेत. 9 जून रोजी अर्जांची छाननी प्रक्रिया पार पडणार असून, 11 जून ही उमेदवारी अर्ज मागे घेण्याची अंतिम तारीख निश्चित करण्यात आली आहे.
या राज्यसभा जागेसाठी 18 जून 2026 रोजी सकाळी 9 ते दुपारी 4 वाजेपर्यंत मतदान होणार आहे. मतदान प्रक्रिया पूर्ण झाल्यानंतर त्याच दिवशी सायंकाळी 5 वाजता मतमोजणी करण्यात येणार असून, निवडणुकीचा निकाल स्पष्ट होणार आहे. संपूर्ण निवडणूक प्रक्रिया 20 जूनपर्यंत पूर्ण केली जाणार असल्याची माहिती निवडणूक आयोगाने दिली आहे.
दरम्यान, ही निवडणूक प्रक्रिया मुक्त, निष्पक्ष आणि पारदर्शक पद्धतीने पार पडावी यासाठी विशेष निरीक्षकांची नियुक्ती करण्यात येणार आहे. निवडणुकीतील प्रत्येक टप्प्यावर आयोगाकडून बारकाईने लक्ष ठेवले जाणार असल्याचेही स्पष्ट करण्यात आले आहे.
महाराष्ट्रातील या राज्यसभा जागेसाठी महायुती आणि महाविकास आघाडी कोणत्या उमेदवाराला संधी देणार, याकडे आता राज्याच्या राजकीय वर्तुळाचे लक्ष लागले आहे. आगामी राजकीय समीकरणांच्या दृष्टीने ही पोटनिवडणूक महत्त्वाची मानली जात असून, दोन्ही आघाड्यांमध्ये हालचालींना वेग आला आहे.
