सांगली शहरातील विजयनगर परिसरात दहशत पसरवण्याच्या उद्देशाने फिरणाऱ्या दोन तरुणांना पोलिसांनी पकडले आहे. स्थानिक गुन्हे अन्वेषण शाखेच्या पथकाने सापळा रचून ही धडक कारवाई केली. चाणक्य चौक ते रेल्वे ब्रीज रस्त्यावर आकाश सायकल मार्टसमोर दोघांना ताब्यात घेण्यात आले.
पोलीस पथकाने संशयितांकडून 2 तलवारी, 2 कोयते, 2 कट्यार, एक चाकू आणि कुकरी असा मोठा शस्त्रसाठा जप्त केला आहे. या प्रकरणी राकेश ऊर्फ टक्या बसवराज वठार वय 23 आणि दऱ्याप्पा पंडित दोडमणी वय 23 दोन्ही राहणार विजयनगर सांगली अशा दोघांवर गुन्हा नोंदवण्यात आला आहे. एलसीबीच्या कर्मचाऱ्यांना बातमीदाराकडून मिळालेल्या माहितीच्या आधारे ही कारवाई झाली.
गस्त घालत असताना पोलीस पथकाला हे दोघे बेकायदा हत्यारे घेऊन उभे असल्याची पक्की खबर मिळाली होती. पोलिसांनी संजीवनी मारुती मंदिराच्या जवळ सापळा रचून दोघांना घेराव घातला. त्यांच्या ताब्यातील कापड आणि पिशवीची झडती घेतली असता ही घातक हत्यारे सापडली.
परिसरात भीतीचे वातावरण तयार करण्यासाठी हत्यारे आणल्याची माहिती तपासात पुढे आली आहे. संजयनगर पोलीस ठाण्यात दोन्ही आरोपींविरोधात भारतीय हत्यार कायद्यानुसार गुन्हा नोंदवला गेला आहे. पुढील कायदेशीर कारवाईसाठी आरोपींना संजयनगर पोलिसांच्या स्वाधीन करण्यात आले आहे.
