राष्ट्रवादी काँग्रेस पक्षाचा २७ वा वर्धापन दिन मुंबईतील षण्मुखानंद सभागृहात अत्यंत भावनिक आणि प्रेरणादायी वातावरणात पार पडला. पक्षाचे ज्येष्ठ नेते तथा राज्याच्या राजकारणातील प्रभावी व्यक्तिमत्त्व असलेले आदरणीय अजितदादा पवार यांच्या स्मृतींना समर्पित हा सोहळा अनेक अर्थांनी विशेष ठरला. दादांशिवाय साजरा होणारा हा पहिलाच वर्धापन दिन असल्याने सभागृहातील वातावरणात भावनांचा ओलावा आणि आठवणींची चाहूल स्पष्टपणे जाणवत होती.
उपमुख्यमंत्री सुनेत्राताई पवार यांनी उपस्थित कार्यकर्ते, पदाधिकारी आणि मान्यवरांना संबोधित करत पक्षाच्या पुढील वाटचालीचा रोडमॅप मांडला. यावेळी त्यांनी स्पष्ट शब्दांत सांगितले की, व्यक्ती जरी काळाच्या पडद्याआड गेली तरी विचार, मूल्ये आणि जनतेसाठी केलेले कार्य कधीच संपत नाही. अजितदादांनी उभा केलेला विकासाचा मार्ग आणि जनतेशी जोडलेले नाते हेच राष्ट्रवादी काँग्रेसचे खरे बळ असल्याचे त्यांनी नमूद केले.
यशवंतराव चव्हाण यांच्या पुरोगामी विचारांचा वारसा आणि छत्रपती शिवाजी महाराज, राजर्षी शाहू महाराज, महात्मा फुले व डॉ. बाबासाहेब आंबेडकर यांच्या सामाजिक न्यायाच्या विचारधारेवर पक्षाची वाटचाल अधिक जोमाने सुरू राहील, असा विश्वास त्यांनी व्यक्त केला.
यावेळी त्यांनी महायुती सरकारच्या माध्यमातून राबविण्यात येणाऱ्या विविध लोककल्याणकारी योजनांचा उल्लेख केला. महिला, शेतकरी, युवक आणि सर्वसामान्य नागरिकांच्या हितासाठी शासन कटिबद्ध असून विकासाच्या प्रश्नांवर राष्ट्रवादी काँग्रेस कायम आघाडीवर राहील, असे त्यांनी सांगितले.
पक्ष संघटना अधिक मजबूत करण्यासाठी आगामी काळात तळागाळातील कार्यकर्त्यांना अधिक संधी दिली जाईल, असेही त्यांनी स्पष्ट केले. पक्षात गुणवत्ता, कामगिरी, पात्रता आणि जनतेशी असलेली नाळ याच्या आधारेच जबाबदाऱ्या दिल्या जातील, असा संदेश त्यांनी दिला.
सुनेत्राताईंनी आपल्या भाषणात संघर्षाचा मुद्दा ठळकपणे मांडला. "राष्ट्रवादी काँग्रेसने अनेक राजकीय वादळांचा सामना केला आहे. अनेक संकटे आली, अनेक आव्हाने उभी राहिली; मात्र पक्षाने आपल्या विचारांशी कधीच तडजोड केली नाही. यापुढेही ती केली जाणार नाही," असे त्यांनी ठामपणे सांगितले.
कार्यकर्त्यांमध्ये विशेष उत्साह निर्माण करणाऱ्या शब्दांत त्यांनी म्हटले, “वादळांना पाहून आम्ही कधी आमची गलबते वळवली नाहीत. संकटांना सामोरे जाताना आम्ही आमची पावले रोखली नाहीत. घड्याळाच्या काट्यांचा हा प्रवास आता थांबणार नाही आणि संघर्षाच्या रणांगणात राष्ट्रवादी काँग्रेस कधीही मागे हटणार नाही.”
या कार्यक्रमातून एकीकडे अजितदादांच्या कार्याला अभिवादन करण्यात आले, तर दुसरीकडे त्यांच्या विचारांचा आणि विकासाच्या वारशाचा धागा अधिक बळकट करण्याचा निर्धार व्यक्त करण्यात आला. दादा नसले तरी त्यांची कार्यशैली, त्यांचे विचार आणि जनतेसाठी झटण्याची प्रेरणा प्रत्येक कार्यकर्त्यामध्ये जिवंत असल्याचा संदेश संपूर्ण कार्यक्रमातून उमटताना दिसला.
राष्ट्रवादी काँग्रेस पक्षाच्या २७ व्या वर्धापन दिनानिमित्त सुनेत्राताई पवार यांनी सर्व कार्यकर्ते, पदाधिकारी आणि हितचिंतकांचे आभार मानत पक्षाच्या पुढील यशस्वी वाटचालीसाठी शुभेच्छा दिल्या.
