मालेगाव येथील जिल्हा व अपर सत्र न्यायालयाने दोन वेगवेगळ्या खून खटल्यांमध्ये अत्यंत महत्त्वाचा निकाल देत दोन्ही प्रकरणांमधील मुख्य दोषियांना जन्मठेपेची शिक्षा सुनावली आहे. मनमाड परिसरात घडलेल्या पहिल्या घटनेत पतीने दारूच्या नशेत केलेल्या मारहाणीत पत्नीचा जीव गेला होता, तर डोंगराळे येथील यात्रेत झालेल्या वादानंतर एका तरुणावर चाकूने वार करून त्याची हत्या करण्यात आली होती. न्यायव्यवस्था आणि पोलीस यंत्रणेने केलेल्या पुराव्यांच्या आधारे हे दोन्ही गंभीर गुन्हे शाबीत झाले असून संपूर्ण परिसरात या निकालाची चर्चा सुरू झाली आहे.
मनमाड भागात ११ जानेवारी २०२१ रोजी घडलेल्या घटनेत रमेश दशरथ जाधव याने दारूच्या नशेत पत्नी फुलाबाई हिला पट्ट्याने व लाकडी काठीने जबर मारहाण केली होती. या हल्ल्यात तिचा चेहरा फर्शीवर आपटल्याने डोक्याला गंभीर दुखापत होऊन तिचा जागीच जीव गेला होता, ज्यानंतर मनमाड शहर पोलीस ठाण्यात गुन्हा नोंदवण्यात आला होता. तत्कालीन पोलीस अधिकारी वैभव महाइंगिरे, पी. बी. गिते व ई. एम. मिसे यांनी तपास पूर्ण करून न्यायालयात दोषारोपपत्र दाखल केले होते. अतिरिक्त जिल्हा व सत्र न्यायाधीश एम. ए. भोसले यांच्या न्यायालयात हा खटला चालला, जिथे सरकार पक्षातर्फे अतिरिक्त सरकारी वकील अशोक पगारे यांनी ८ साक्षीदार तपासून बाजू मांडली.
दुसरी घटना ९ ऑक्टोबर २०२२ रोजी डोंगराळे येथील जैतोबा महाराज सोहळ्यात घडली होती, जिथे एका मुलीच्या छेडछाडीचा जाब विचारणाऱ्या तरुणावर जीवघेणा हल्ला करण्यात आला होता. जळगाव जिल्ह्यातील दहिगाव-मोहाडी येथील अर्जुन धनसिंग ठाकरे हा नातेवाईकांशी सोहळ्यासाठी आला असताना, आरोपी गोकुळ आहिरे याने मुलीशी गैरवर्तन केल्यावर जाब विचारण्यात आला. यावेळी गौरव दादाभाई हदप याने बुटात लपवलेला चाकू काढून वार केले आणि मध्यस्थी करणारा अर्जुन ठाकरे याच्या मंदीवर वार केल्याने उपचारादरम्यान त्याचा जीव गेला. तालुका पोलिसांनी या प्रकरणात गुन्हा नोंदवून तत्कालीन उपविभागीय पोलीस अधिकारी पुष्कराज सूर्यवंशी यांच्या मार्फत तपास करत विशेष पोक्सो न्यायालयात दोषारोपपत्र सादर केले होते, जिथे न्यायाधीश के. जी. पालदेवार यांच्यासमोर सुनावणी झाली.
न्यायालयाने दोन्ही प्रकरणांमधील पुरावे व युक्तिवाद ग्राह्य धरून रमेश जाधव याला जन्मठेप व ५ हजार रुपये दंड, दंड न भरल्यास १ महिना साधा कारावास अशी शिक्षा सुनावली. तसेच दुसऱ्या प्रकरणात गौरव हदप याला खुनाच्या गुन्ह्यात जन्मठेप व २५ हजार रुपये दंड ठोठावला, तर गोकुळ आहिरे याला बाललैंगिक अत्याचार कायद्यान्वये ३ वर्षे सक्तमजुरी व १० हजार रुपये दंड अशी शिक्षा दिली. दंडाची एकूण ३५ हजार रुपयांची रक्कम मृत अर्जुनच्या वडिलांना नुकसानभरपाई म्हणून देण्याचे आदेश न्यायालयाने दिले असून या निर्णयामुळे गुन्हेगारांमध्ये वचक निर्माण होणार आहे.
