पाकिस्तान क्रिकेट संघाच्या इंग्लंड दौऱ्यावर मोठी उलथापालथ झाली आहे. इंग्लंडविरुद्धच्या तीन सामन्यांच्या कसोटी मालिकेत पाकिस्तानने पहिले दोन्ही सामने गमावल्याने पाकिस्तान क्रिकेट बोर्डाने संघाच्या व्यवस्थापनात मोठे बदल केले आहेत.
पाकिस्तानचे टेस्ट हेड कोच सर्फराज अहमद आणि गोलंदाजी प्रशिक्षक उमर गुल यांना त्यांच्या पदावरून हटवण्यात आले आहे. सर्फराज अहमद यांची एप्रिल २०२६ मध्ये टेस्ट संघाच्या मुख्य प्रशिक्षकपदी नियुक्ती करण्यात आली होती. मात्र काही महिन्यांतच त्यांना पद सोडावे लागले.
इंग्लंडविरुद्धच्या दुसऱ्या कसोटीत लॉर्ड्सवर पाकिस्तानचा १९४ धावांनी पराभव झाला. या पराभवासह इंग्लंडने मालिकेत २-० अशी विजयी आघाडी घेतली. पहिल्या कसोटीतही पाकिस्तानला डावाने आणि १०३ धावांनी पराभव स्वीकारावा लागला होता.
या दोन्ही सामन्यांमध्ये पाकिस्तानच्या फलंदाजीची कामगिरी विशेष निराशाजनक राहिली. मालिकेतील एकाही डावात पाकिस्तानला २०० धावांचा टप्पा ओलांडता आला नाही. लॉर्ड्स कसोटीत सौद शकीलने ९७ धावांची झुंजार खेळी करत काहीसा प्रतिकार केला, मात्र संघाला पराभवापासून वाचवता आले नाही.
कोचिंग स्टाफमध्ये बदल करण्याबरोबरच पाकिस्तान क्रिकेट बोर्डाने सात खेळाडूंनाही संघातून रिलीज केले आहे. मोहम्मद रिझवान, सलमान अली आगा, इमाम-उल-हक, अली उस्मान, आमिर जमाल, आवैस जफर आणि खुर्रम शहजाद यांचा या बदलांमध्ये समावेश आहे.
सर्फराज अहमद यांच्या जागी पाकिस्तानचा व्हाईट-बॉल प्रशिक्षक माईक हेसन टेस्ट संघाची जबाबदारी सांभाळणार आहे. त्यांच्या सोबत नॉफके यांच्याकडे गोलंदाजी प्रशिक्षकपदाची जबाबदारी देण्यात आली आहे.
पाकिस्तानच्या नव्या संघात सायम अयुब, अब्दुल्ला फजल आणि अराफात मिन्हास यांच्यासह काही नव्या खेळाडूंना संधी देण्यात आली आहे. त्यामुळे तिसऱ्या कसोटीत पाकिस्तानच्या संघरचनेत मोठे बदल पाहायला मिळणार आहेत.
इंग्लंड आणि पाकिस्तान यांच्यातील मालिकेतील तिसरी आणि अंतिम कसोटी ९ सप्टेंबरपासून बर्मिंगहॅममधील एजबॅस्टन मैदानावर खेळवली जाणार आहे. मालिकेत २-० अशी पिछाडी असल्याने पाकिस्तानसमोर प्रतिष्ठा वाचवण्याचे मोठे आव्हान असणार आहे.
