जळगाव जिल्हा मध्यवर्ती सहकारी बँकेच्या निवडणुकीमुळे राजकारणाला वेगळी दिशा मिळाली असून, अर्ज भरण्याच्या शेवटच्या दिवशी अनेक प्रमुख नेत्यांनी जोरदार शक्तिप्रदर्शन केले. या निवडणुकीत मंत्री गिरीश महाजन, आमदार मंगेश चव्हाण, आमदार सुरेश भोळे आणि अमोल पाटील यांच्यासह अनेक बड्या नेत्यांनी आपले अर्ज दाखल केले आहेत. या घडामोडींमुळे राजकीय वातावरण तापले असून, विविध जागांसाठी सुमारे २५० ते ३०० अर्ज दाखल झाल्याची माहिती समोर आली आहे.
निवडणुकीच्या निमित्ताने महायुतीमध्ये जागावाटपाचा तिढा अद्याप सुटलेला नाही, असे चित्र दिसत आहे. राष्ट्रवादी काँग्रेससोबतची चर्चा सकारात्मकरीत्या पूर्ण झाली असली, तरी शिवसेना आणि भाजपमधील जागांचा प्रश्न कायम आहे. जर यावर कोणताही तोडगा निघू शकला नाही, तर मैत्रीपूर्ण लढत स्वीकारली जाईल, असे संकेत आमदार मंगेश चव्हाण यांनी माध्यम प्रतिनिधींशी बोलताना दिले. खबरदारीचा उपाय म्हणून सर्वच प्रमुख पक्षांच्या कार्यकर्त्यांनी आपले अर्ज दाखल करून ठेवले आहेत.
बँकेचा वाढलेला एनपीए आणि आर्थिक अडचणी ही वस्तुस्थिती असल्याचे मान्य करत, बळीराजाचे हित जपणे हाच आमचा मुख्य अजेंडा असेल, असे चव्हाण यांनी स्पष्ट केले. याआधी जिल्हा दूध संघ अडचणीत असताना त्याला नफ्यात आणण्यात यश आले होते, त्याचप्रमाणे बँकेसमोरील आर्थिक आव्हानांवर मात करून ती सक्षम चालवली जाईल. तसेच काँग्रेसने केलेल्या घराणेशाहीच्या आरोपावर पलटवार करत, त्यांना नैतिकतेवर बोलण्याचा अधिकार नाही, अशी भूमिका मांडण्यात आली.
आता महायुतीमधील जागावाटपाचा हा पेच कसा सुटणार आणि महाविकास आघाडी काय रणनीती आखणार, याकडे साऱ्या जिल्ह्याचे नजर लागली आहे. प्रत्यक्ष निवडणुकीत कोणते नवे राजकीय समीकरण समोर येते, हे आगामी काळात स्पष्ट होईल.
